اكتب اليكم بعد نصيحة احد الاصدقاء عن ابطال الثورة الذين اعرفهم

حكاية اليوم عن محمد و اخوه السيد شباب الشرابية

عرفت محمد في موقعة مجلس الوزراء, عقب اقتحام قوات الجيش للمستشفى الميداني المقامة بجوار الكنيسة و اعتقال الاطباء و ضربهم

انتقلنا الى ميدان عبدالمنعم رياض و قمنا بعمل مستشفى ميداني اخر و كان محمد اول المستقبلين هو و ضابط جيش اخر قد امسك بيه الشباب اثناء انسحاب القوات من الميدان لن اتحدث عن الضابط حتى لا تصابوا بالاحباط مثلما اصبت به و لكن سأخبركم عن محمد

محمد كان مصاب بطلق ناري نافذ من اسفل الظهر و خرج من فخده اطلق عليه من الخلف , قمنا بعمل الاسعافات الاولية لمحمد و كان لابد ان نقوم بعمل اشعة حتى نطمئن انه لم يحدث كسور او يحتاج الى تدخل جراحي بسبب الطلق الناري

بعد 4 ساعات من اللف على المستشفيات توصلنا الى مستشفى في العجوزة قبلت ان تقوم بعمل اللازم. طوال ال 4 ساعات لم اسمع من محمد كلمة اه واحدة كان ثابت و ساكت يعتصر شفتيه من الالم و لكنه لم يصر انين او يعبر عن وجعه

محمد امي لا يقرأ ولا يكتب و اثناء انتظار وصول اخوه حتى يأخذه دار بيننا الحوار التالي:

انا: انت ايه اللي نزلك يا محمد

الصراحة يا اسطى(محمد عامل حديد كرتال يعمل باليومية و الاسطى ده اكبر لقب عنده) صورة البت (ست البنات) نرفزتني افرض اختي يعني و بعدين العالم ديه كفره في حد يعمل كده في الحريم؟

انت بتعرف تقرأ يا محمد

لأ بس ببص على الجرايد باتفرج على الصور, المشكلة يا اسطى اني كده حقعد في البيت مش حعرف انزل الشغل و الحال حيقف

اثناء الحوارات لم تنقطع التليفونات من والد محمد ليطمئن على ابنه و كان يبدوا على محمد عدم الرغبة في ان يقول لوالده الحقيقة خوفا منه او رغبة في عدم بث القلق لديه

السيد بقى اخو محمد وصل و اخد اخوه و كنت اقول له اخوك بطل و جدع من شباب الثورة فكان رده قاطعا و حاسما الله يلعن ابو الثورة احنا اخدنا ايه منها اهو حيقعد في البيت من غير شغل

في اليوم التالي وجدت والد محمد يتحدث الي و يخبرني ان السيد قادم للميدان حتى يعتذر لي فسألته يعنذر عن ايه قالي لما يجي حتعرف

وصل السيد و معه 4 من اصدقاؤه

الشله كلها لا تعرف القراءه ولا الكتابة , من الشرابيه الشله كلها من مصابي الثورة و محدش فيهم راح طلب لا تعويض ولا طلب حاجة

انتم بتنزلوا ليه

بص يا هندسة

طول ما العالم ديه (شرطة و جيش) بيدبوا في الناس حننزل احنا مش حنسكت على الافترا و لو انتم اللي واقفين الناحية التانية ورا الجيش و الشرطة و بتضربوا الناس حننزل ندب فيكم

مش حنسكت على ناس تشيل سلاح و تضرب في عزل تاني ولا حنسيب الداخلية ترجع تفتري زي زمان ولا الجيش كمان يا يتعاملوا بالعقل يا حندب فيهم

انما قصة التغيير بقى و مين يفضل و مين يمشي ديه بتاعتكم انتم بهاوات و فاهمين عننا في الحاجات ديه

الشباب ده لا واخد فلوس ولا بينزل عشان حد يقوله انت جدع الشباب ده بينزل عشان هدف اخلاقي انساني وحيد هو منع القمع

مينفعشي ناس بتهتف ولا نايمة في الشارع تنضرب بالنار ده استهبال 

صوتي لمرسي 2

الجزء التاني من صوتي لمرسي

اسقاط النظام

ممكن نعرف ايه هو النظام ؟

النظام مش الحزب الوطني بس ولا الحكومة ولا مجلس الشعب

النظام زي الويندوز بتاع الكمبيوتر ممكن تشيلة و تستخدم لينكس و تتعلم تستخدمة و لو استخدمته حتدمنه كمان عن تجربة

النظام هو مجموعة من الافكار و الادوات التي تستخدم في حكم الدولة

النظام الذي حكم و يحكم و يرغب في حكم مصر عن طريق الشفيق فريق هو نظام اقل ما يقال عنه انه نظام قمعي مستبد لدية ادوات تتمثل في السلاح فقط و اناس يستخدمون هذا السلاح

هذا النظام الفاشل لن ينجح في حكم مصر يوم اخر بعد 30 يونيو ليه؟ لأنه مهلل و هابط و فاشل و جبان و تخلص بنفسه بالفعل من كل مصادر قوته من كل من يستطيع استخدام السلاح و يقهر الشعب و ادرك الشعب ده و انهى تلك القوة في 4 ساعات فقط و عاد الى منزله

انتصرت الثورة للابد يوم 28 يناير 2011 عندما احرقت كل امكانيات الدولة المستبدة

بل و ايضا اظهرت الغضب لمدرعات الجيش التي حاولت الانضمام الى قوات الشرطة  من اجل قمع الشعب

بعد التخلص من ادوات القمع الكبيرة و الجيش العظيم ذو المليون و 800 الف جندي امن مركزي عاد الشعب الى منازله يراقب الاعلام و ما ستقوم به النخبة السياسية من اجل التخلص من نظام مبارك

احرقت الثورة اقسام القمع و تخلصت من الوسائل اللوجيستية التي يستخدمها النظام و عادوا الى المنازل

نعم تبقى الكتير في الميدان و لكن الاكثر عادوا للمنازل تاركين هؤلاء المعتصمون يتحدثون بلسانهم و لا يبدون اعتراضا عليهم و ظلوا يساندوهم في كل مليونية دعوا اليها من اجل التخلص من النظام و الطاغية

نيجي لعملية التخلص من النظام

في شغلنتي في حاجة اسمها استبدال التربة , قبل البناء نقوم باستبدال التربة نشيل التربة الفاسدة و نضع مكانها رمال نظيفة و ذلك من اجل ضمان البناء على تربة سليمة غير قابلة للانضغاط و التمدد حتى لا يحدث هبوط للمبنى

من اجل استبدال النظام لا بد من وجود الرمال النظيفة ... من لدية تلك الرمال ؟

من لدية نظام و افراد قادرون على استبدال نظام مبارك؟

اسامة الغزالي حرب صاحب الحزب الليبرالي الذي لديه 3000 عضو؟ ام حزب التجمع؟

مين عنده ناس ينفع يتحشروا مكان النظام؟

معليش الاجابة مش حتعجبكم الاخوان المسلمين

اه زي ما سمعتم  ... فيهم اساتذة جامعة و فيهم شباب و فيهم كفاءات و منظمين و بقالهم 80 سنه بيحضروا انفسهم للحظة ديه

مين تاني استعد غيرهم؟ الليبراليين اللي لما انسحب البرادعي لم يجدوا مرشح رئاسي لهم؟

ولا اليساريين اللي انقسموا الى 6 تيارات واحد مع ابوالفتوح و واحد مع حمدين و البسطويسي و خالد علي و مقاطعون

معليش هذا هراء هراء هراء مستمر

اللي عايز ينافس الاخوان يشتغل على كده

انما رايحين تدعموا بلطجي عسكري من اجا ان تنتصروا

ده نوع من الوضاعة و الخسة

اراهنكم لو فيه حزب واحد في مصر قادر على ان يجمع 20000 صوت من اعضاؤه و يقنعهم او يجبرهم على اتخاذ رأي موحد في قضية ما

افيقوا يرحمكم الله

صوتي لمرسي

يلعن ابوهم الاتنين واحد خاين و التاني قاتل انا مقاطع ...

انا انتخبت حمدين و صوتي باطل في الاعادة انا عايز دولة مدنية

ما ينفعشي رئيس خالص .. ما شوفتش مراته شكلها ايه؟ ولا لابسة ايه؟

يا عم انا مسيحي ارحم امي ادي صوتي لاخوانجي ازاي؟

المرشد هو اللي حيحكم مش مرسي ... ينزلوا المرشد بنفسه و نشوف ..

انا مقاطع عشان الجوز زبالة و حنزل اعترض عليهم في التحرير

انت اصلك مش فاهم انا ضد الدولة الدينية و ضد الاخوان عشان كدابين مش كفاية مناقشة قانون نكاح الموتى

شوفت قانون تجريم المظاهرات ؟ دول حيركبوا و مش حينزلوا قبل 80 سنة

صوتي لشفيق خليه يلم العالم الزبالة ديه و يرجعها السجون تاني

صوتي لشفيق عشان انا عايز الاستقرار و الجيش حيموت اي حد ينزل الشارع بعد كده

الاخوان حيبيعوا قناة السويس ... طبعا صوتي لشفيق

.......................................................................................

ديه عينة من الخراء المستمر اللي بسمعه من فئة المثقفين و المتعلمين و المديرين و خريجي الجامعات

و اكثر ما يحزنني ليس هو الكلام السابق و لكن ما فعله التعليم في المصريين

فراغ عقلي رهيب و قلة وعي و قلة تركيز و استماع للاعلام بطريقة مقززة بالرغم من انه نفس اعلام الضربة الجوية الاولى و انجازات مبارك و مش بس نفس الاعلام ده نفس الاعلاميين بنفس الكلام لا ينطبق عليهم سوى قول جوبلز

 وزير اعلام هتلر : "اكذب اكذب اكذب حتى يصبح الكذب حقيقة"

هتف الشعب : الشعب يريد اسقاط النظام مرات عديدة و كثيرة تظهر حنقة و غضبة من هذا النظام, احرق اقسام الشرطة التي تمثل له القمع الصارخ فمن منا لما يعاني بدرجات مختلفة داخل الاقسام و كل حسب ميزانيته و امواله

و لأجل اسقاط النظام ابتعدت مصر عم الاستقرار

عانى هذاب الشعب باستمرار منذ عام و نصف من نقص كل وسائل الحياة من انسحاب الامن و نقص المحروقات و نقص الوظائف و محاربته في اكل عيشة

عانى من 6 مجازر من محمد محمود 1,2,3 و مجلس الوزراء و بورسعيد و  

العباسية

لم يصمد شعب تاريخيا في مواجهة نظام كالثعبان الذي يعيش بيننا بهذة الطريقة

عندما سألت الاصدقاء الليبيين عما فعلوه مع الفلول كان سؤالهم ايش فلول هذة ؟ قلت لهم اتباع القذافي

اجابوني ماتوا يا اخي ايش فلول كيف يعيشوا مع الاحرار !!!

فأدركت عظمة شعبنا و رقيه و لكني لا اتصور ان يستمر بنفس الطريقة فللصبر حدود و الحدود مفتوحة و الاخوة في ليبيا لم يعودوا يحتاجون السلاح فلا بأس من يستلفه منهم اخواتهم المصريين

نرجع للمهم .... سأنزل و صوتي لمرسي فالوقت الان ليس وقت خلافات سياسية ضيقة ليس لي الحق في ان اكسبها لأني لم اعمل من اجل ان اكسبها

عايزين دولة مدنية؟ اللي هي من انهي نوع؟ هولندا ولا فرنسا ؟ امريكا ولا كندا ؟

يعني مواقفين على حقوق شواذ ؟ طيب موافقين على منع الحجاب؟ ولا موافقين على بيع المخدرات في الشوارع عادي؟

الاختيار ملككم

شفيق ليس مرشح الدولة المدنية شفيق مرشح النظام القديم و من لا يدرك ذلك فهو مصمم على وضع رأسه في الرمال

خوفك من الاخوان او رغبتك في جلب من يوعدك ان يقمعهم هو خيبة ثقيلة

فحتى القامع الذي تجلبه فاشل و سيستمر فشلة في الاستمرار و لكن بصورة اخرى

رجل ليس لديه برنامج سوى اني سأحارب الاخوان

رجل فاشل فشل فيها المجلس العسكري ذو ال 19 ديكتاتور

و سيفشل فيها رقم 20

محاولة مساواة شفيق بالاخوان هي ليست محاولة عقلية فاشلة ولكنها تنم عن جهل شديد

لم نسمع من شفيق كلمة معارضة لمبارك او نظامة في يوم من الايام

لم نره مقاتلا مدافعا عن حقوق شعب اذله الله بمبارك حتى انتفض

لن احدثكم عن الوزراة المتوقعة من شفيق برئاسة فايزة ابو النجا مثلا

بل سأستعجب من جيل اخر ... جيل فوق الستين مازال مصمما على قهرنا و قهر جيلنا يوم وراء الاخر

سكتوا على الظلم بل ان منهم من هتف لناصر مضيع الارض و مقسم الدولة و اكتر من اعطى لليهود من مكاسب

و مازالوا يهتفون بحياة مبارك و سيهتفون من بعده لشفيق

هؤلاء من سكتوا على قمع مبارك لكم في الثمانينات و التسعينات يا اخوان

هؤلاء من قبلوا باتفاقية سلام تنزع السيادة و الحقوق

لن اهدد و ازايد عليكم من اراد منكم الثورة فالشارع موجود لو جاء شفيق و حاول يقمع اي من يعيش على ارضك مصر فسأنزل و امنعه بجسدي و بهتافي

الاخوان ليسوا ملايكة هذا امر واضح مثلنا جميعا

لديهم رغبة في الاستيلاء على السلطة !!! و اي قوى سياسية في العالم او حزب سياسي لا يرغب في الاستيلاء على السلطة

الاخوان معاهم فلوس اكيد مش كل عضو بيدفع من 7 الى 10% من دخله من اجل الجماعة

انت ممكن تدفع 10% من دخلك من اجل فكرة؟ اي فكرة؟

عندك استعداد تلف مصر على موتسيكل من اجل نشر دعوتك؟

صوتي لمرسي و انا حاجز كرسي في المعارضة و لو نجح شفيق فسأحجز مكاني في الجنة ان شاء الله فلن يدخل القصر سوى على جثتي حتى لو كنت وحيدا

لن يلمنا شفيق و لن يستطيع و لن نخون دم الشهداء و نجلب رئيس وزراء مبارك او وزير طيرانه لعشر سنين

و لكن اكثر ما اعجبني فيما يحدث ان كثير من الاصدقاء و الاقارب بانوا على حقيقتهم

اللهم عليك بالظالمين و من يواليهم