1990 حرب الكويت
كان عندي 11 سنة و كنت قد قرأت كل ما وجدته في مكتبة المدرسة من كتب عباس العقاد و نجيب محفوظ وبالطبع كان المصروف كله يذهب للدكتور نبيل فاروق
الغريب اني فضلت مبلم مش فاهم مين مع مين و مين ضد مين و فين الاسرائيليين
هو مش عدونا واحد ولا الناس ده هبلة
كنت ساعتها بتعلم في مدرسة لغات و كان عندنا قس فرنسي الجنسية يتولى تعليمنا اللغة الفرنسية
و حصلت مشكلة في الفصل مش فاكر تفاصيلها بس فاكر انه ساعتها قالنا ان عيب المصريين كلمة "معلش"
ماشي ياسيدي
لأ مش ماشي
لأني اعدت ابعتلة جوابات من غير مأقول اسمي لأكتر من شهر
ان اللي بيقولوه غلط
و ان بلدنا حلوة
و ان فرنسا هيا كمان فيها مشاكل و بلا بلا بلا
كنت صغير طبعا بس ازاي واحد فرنساوي يشته في بلدي
الراجل بعد الشهر عدا على الفصول يعتذر لينا كلنا و يقول لنا انا اسف عشان ماوضحتش قصدي
انتو فهمتوني غلط
بلدكوا على عيني و راسي
انا عايزكوا تخلوها احسن
لما قال كدة خدت بعضي و روحتلو و قلتلوا انا اللي ببعتلك الجوابات
راح عازمني على ليمون و قاللي يا محمد
بلدكو ممكن تكون حلوة زي ماانت شايف
بس عشان تبقى احسن لازم انتو تخلوها احسن
عندكوا حاجات احسن من فرنسا
بس فرنسا و اوروبا فيهم حاجات كتير احلى زي كذا و كذا ......
بيني و بينكوا انا لاقيت عندة حق
خصوصا انوا قاللي ان بلدكوا ماحدش يقدر يخاليها احسن غيرك
قولتلوا انا
قالي ايوة
انت
انت لما تبقى شاطر و تخلي اللي حواليك شاطرين
بلدكو تبقى احسن
و مش انت بس
انت و كل اللي بتشوفهم و تعرفهم
المهم
ساعتها ابتديت ادور على حاجات تانية اقرأها
و لفت الدنيا بيا كتير
من سيد قطب و سيد سابق و كتب الأخوان و حسن البنا
لحد ديكارت و غيرة
طلعت ساعتها و انا عندي 13 سنة بنتيجة
ان المسلمين و العرب كلهم حاجة
و الحكام بتوعهم حاجة تانية
و ان اسرائيل و امريكا و حكامنا سوا سوا
لية
عشان لو احنا سوا كان زمان اسرائيل ديه بخ
نيجي ليوم 25 يناير
بصراحة كدة دة اليوم اللي كل الناس حذرت منة من 20 سنة
ده يوم الانفجار
لية مش سري عشان دة مش يوم بتاع حد
ده يوم المصريين كلهم
ده مش انقلاب عسكري ولا محاولة لقلب نظام الحكم
ديه عمليه جراحية
الغرض منها التخلص من السرطان اللي عايش فينا
لغرض منها محاربة الحرامية اللي بيسرقونا و جوعونا و ضللونا و حاسسنوا اننا زبالة
و خلونا نرمي الباسبور في الزبالة و نقول علية الأخضر ابو فرخة
و علمنا الأحمر في ابيض في اسود برضة ابو فرخة
دي محاولة للفوضى
عشان مش فاضلنا غير الفوضى
زي ماتيجي
انا اسكندراني عايش في القاهرة بس حانزل الشارع
حنزل انا و البوابين اللي في العمارات حواليا
البوابين اللي مستغربين انت نازل لية
و قولتلهم نازل عشان ولادي و ولادكم
عشان ولادنا مايستهلوش كدة
مايستهلوش يتعذبوا في الأقسام
و لو حد قرب مني حضربة
و مش حاسيبه
انا من حقي قانونا اني اعترض و لازم الشرطة تحميني
و لو الشرطة حاولت تمنعني او تضربني
حاضرب فيهم
حايعملوا لي اية
ماقتلوا اخويا خالد سعيد
و قتلوا اخويا سيد بلال
و قتلوا ناس كتير
انا مش حبقى الثور الأبيض
