الكلام ده كتبه د. أحمد قاسم
جراح مصري يعمل في مدينة صغيرة في البحيرة
ويقطن في الاسكندرية
انا مخنوق بطلوا تستخفوا بعقلي
في جريدة المصري اليوم فريد الديب بيصرح ان رئيس الجمهورية لا يملك اكثر من ميلون دولار واستحالة نقله الي طرة.
وبعد 24 ساعة يطلع بيان من النائب العام نسيوا يكتبوا بناءا علي تعليمات فريد الديب المحامي استحالة نقل مبارك الي مستشفي سجن طره. لان حالته حرجه والمستشفي ينقصه تجهيزات. بقالنا شهور مش عارفين نجيب التجهيزات انتوا ناسين ان البلد دي فيها دكاترة وعارفين ان الاجهزة دي موجودة في مستشفيات الصحة وممكن تتنقل وتتحط في مستشفي سجن طره وممكن تتجهز في خلال 24 ساعة، وكل اللي عايزه المتهم محمد حسني مبارك علشان يتحط في مستشفي السجن اللي بقالوا عشرات السنين بيستقبل ناس اسف اشرف من المتهم حسني الف مرة وبنفس صورته الحالية وبعدين ما تيجوا نجيب من الاخر.
في ..في مصر مجلس اسمه مجلس القضاء الاعلي الشهير بمجلس السبعة وفي .. في مصر برضوا حاجة اسمها مجلس الدفاع الوطني اللي علي حد علمي فيه مدير المخابرات الحربية ومدير المخابرات العامة والامن القومي والامن الوطني وممكن مساعدة وزير مباحث الاموال العامة،ويشوفوا الاوراق اللي مع اعضاء مجلس الدفاع الوطني تبحث بواسطة مجلس القضاء الاعلي اذا كانت الادلة ترقي الي مستوي الاتهام والراجل دا سارق اكتر من مليار دولار واشترك في قتل يبقي متهم ومجرم وخاين لامانة سلمها له اكتر من 80 مليون مصري كان ربنا ثم حسني مبارك مسئول عن اقواتهم واعمارهم وارزاقهم وصحتهم لمدة تلاتين سنة الا تكفي خيانته لهذه الامانة العظيمة بأن يعامل كمتهم ويوضع في سجن طره ويا جماعة الاعمار بيد الله هو مش احسن من كل الناس واذا كان مش مذنب والبلاغات كيدية اعلنوها بصراحة وانا اول واحد هطلع اشكره علي تلاتين سنة استهلكت فيهم وتحملت اكتر من طاقتى علشان اقدر اعيش حياة شبه كريمة واربي ولادي مع اني المفروض اني احمل شهادات جامعية ومهارات تؤهلني اني
احصل علي رزقي ومتطلبات حياتي بصورة اسهل الف مرة من اللي شوفته ولا اتعرض لكم الضغوط الهائل علي اعصابي وانا بعمل عمليات في اماكن غير مجهزة واتحمل مسئوليات جسيمة وافضل قلقان بالايام مش عارف انام.
هسامحه عن كل السنين دي لو هو مش مذنب بس لو مذنب مش هسامح لا المجلس العسكري ولا شباب الثورة ولا مجلس الوزراء ولا اي حد بايده الامر
ولا انا غلطان
وعلي فكرة انا مش لوحدي في ناس مرت بظروف اوحش الف مرة وعاشوا في فقر وجوع وولادهم ماتوا علشان مفيش فلوس يعالجوهم وفي ناس دخلوا السجون وعمرهم ضاع واسرهم ادمرت وحاجات كتير حصلت لاهل البلد دي كلها اوحش من بعضها بسببه صعب ان الناس تسامح في دا كله علي الاقل يتعامل زي اي حرامي وقاتل اذا كانت دي التهم اللي يستحقها وبالنسبة الاستاذ فريد الديب المحامي حبيب الشعب بيقول ان الريس معندهوش مليون دولار بذمتك ودينك يا استاذ فريد لو دي كل ثروته كنت هتعبر امه ولا مؤاخذه وتروح لحد شرم الشيخ علشان تحضر تحقيق ياخي اهه دا المليون دولار ميكفوش حضرتك تقراء الورق بس يا حبيب الشعب يا حبيب الملايين ياللي ان شاء الله الشعب والناس اللي اتظلموا هيقتصوا منك اصل دا مش قاتل راقصة ولا سارق قرشين من بنك دا قاتل شعب وسارق بلد يعني الخصم مش عبد الستار تميم الخصم 80 مليون مصري يا فريد باشا
ملحوظة:-
ممكن اللجنة الطبية اللي اقرت مستشفي سجن طره اللي ناقصة تجهيزات تكتب الاجهزة المطلوبة علشان الشعب يدبر تركيبها فورا في المستشفي شوفتوا بقي ان التقرير دا في استخفاف بعقولنا والثورة قامت علشان الخصلة الوسخة دي تتبطل
علي فكرة اللي بيحصل دا معناه ان قطار الاصلاح واقف وان نتيناهو مش عايز البلد تنضف وهو اللي ورا اللي بيحصل دا.
عقلي الصغير بيقولي كده خدوني علي اد عقلي
