موضوع قطاع الطاقة في مصر ودعم الطاقة
شوية أفكار كده بس استحملوني أول حاجة مصر فيها 5 أنواع من البنزين يتم بيعهم في السوق بنزين 80 و 90 و 92 و 95 و 98 طبعا ده كلام عجيب وزيادة عن اللزوم ليه ميبقوش نوعين بالكتير ؟ كده نوفر فيه عملية انشاء أصول ثابتة توزع الخمس منتجات
نيجي لتاني نقطة هو إيه اهمية البنزين والعربيات ؟ احنا دولة معندناش نظام نقل محترم وبالتالي الناس بتعتمد على العربيات أو الميكروبصات وكل دول يا إما شغالين ببنزين أو شغالين بسولار وفي الحالتين الدولة بتصرف فلوس عليهم
طيب هو ينفع نستغنى عن العربيات ؟ أكيد لأ طيب ينفع نعمل مواصلات عامة آه ممكن بس برده حال عايز فلوس رهيبة وعايز تغيرات في قوانين العمل وظروف العمل المصرية وفي النهاية برده مفيش بلد الناس فيها مش بتستخدم العربيات
طيب مصر بتدعم البترول وده اللي هو السولار والبنزين بحوالي 70 مليار وعلى فكرة اغلب الدعم رايح للسولار مش للبنزين بس برده البنزين محتاج حال هو والسولار
بلدنا مليانة غاز طبيعي والكلام ده مش أفكار خزعبالية لأ ده واقع وأي واحد بيفهم في الجيولوجيا حيقول الكلام ده عشان حاجات كتير ممكن تتفهم من الكام رسمة اللي أنا حاحطهم في المقال
أول قرار ناخده يا توكيلات السيارات اللي حيجيب عربيات شغالة بغاز طبيعي بس من غير بنزين حتى لو هي 6000 cc مش حيدفع جمرك أو حيدفع حاجة رمزية 6000 جنيه واشمعنى 6000 عشان أنا حشتري بالفلوس ده مواتير غاز جديدة و حاخليها تركب في وسائل المواصلات وعربيات الناس وحركبهم للناس ببلاش كمان واتخن موتور مش حيزيد عن 1000 دولار اللي هم 6000 جنيه
حاجات تانية أولا الهيئة العامة للبترول لازم تتم اعادة هيكلة كاملة ليها مينفعشي يبقى عندنا مليون شركة وكلهم بيخسروا عشان مش عارفين نشغلهم عدل كل دول يبقوا شركة واحدة كبيرة زي كل دول العالم يعني شركة فيها من أول تنقيب وبحث لحد توصيل المنتجات للزباين وهي شركة واحدة ومش معنى كده إننا حنمشي الناس لأ الناس ده هي الأصول اللي بجد احنا حنستغل الناس وندخل أسواق جديدة يعني نيجيريا بتدور على حد يجي يشتري منها ابار نروح ليبيا السعودية السودان زي أي شركة دولية وعندنا الناس والكفاءات ولو الناس مش جاهزة 100% يبقى نخليهم جاهزين تدريب وتجهيز في النهاية لازم الوزارة ده تصرف على البلد مش البلد اللي تصرف عليها
مصر للبترول والتعاون عندهم 2200 محطة بنزين في منهم حوالي 1800 محطة أقل واحدة فيهم مساحتها 800 متر
إيه المشكلة ننبي عليهم مبني ومحلات وأسواق ومكاتب ادارية ونأجرهم والبنزين يتباع في الدور الأرضي ؟
تنفع ؟ آه تنفع ومفيهاش مشاكل بالعكس ده كده لو قلنا حنبني 5 ادوار والدور700 متر ونأجر المتر بـ 300 جنيه فيه الشهر يعني المحطة الواحدة توفر لينا كل شهر مليون جنيه يعني حوالي مليار و 900 مليون كل شهر في السنة22 مليار جنيه وده واحنا بنقول يعني 700 متر المحطات عادةً بتبقى 2000 متر
فيه أفكار تانية كتير ومتجربة في دول تانية كتير برده بس مينفعشي الكلام ده يتقال هنا عشان الناس اللي مستفيدة من النظام ده معرفشي ممكن يعملوا إيه
بس اللي أنا عارفه كويس إن البلد مليانة خبرات في قطاع البترول منهم ناس على المعاش ممكن يساعدونا بخبراتهم وبدون مقابل وبدون الزام يعني أراء وأفكار استشارية بس غير ملزمة ولا مدفوعة الاجر
