عن الإخوان اتكلم
كل مرة كنت بفكر أكتب الكلام ده امسك نفسي الصراحة واقول لأ بلاش إنت أو الصبر الصبر إن شاء الله ربنا يهديهم
كتبت عليهم كلام قبل الثورة أيام الإنتخابات البرلمانية وقلت كلام بايخ
وبعدين قامت الثورة وحصل منهم حاجات بايخة قبل يوم 25 ويوم 25 نفسه وحصل من اللي اعرفهم منهم ندالة مثلا في الجمعة اللي قبل25 يناير , طلبت منهم قبل الصلاة إننا ندعو الناس تصلي على شهداء تونس ورفضوا ومشيو لما كلمت الناس
وبعد الصلاه بتكلم معاهم على الندالة ده قالولي يعني لو عملنا حاجة أنت معانا قلتلهم لأ الشعب مش مستنيكم لو الشعب عمل حاجة
انتم اللي حتبقوا معاه ولا لأ وقفلنا الكلام على كدهونزلنا يوم 25 ومكانوش معانا
بس الصراحة الحق يتقال يوم 28 كانوا معانا وضربوا الأمن المركزي علقة جامدة مع الناس برده
المهم يوم 28 بعد ما الجيش نزل أنا عن نفسي عرفت إن حسني كده مشي خلاص عشان اللي بينزل الجيش مش هو اللي حيرجعوا
بعد كده وأثناء الاعتصام فوجئت بيهم رايحين يقابلوا عمر سليمان !! إيه يا جماعة الإجماع الوطني بيقول لأ مفيش تفاوض
هو يمشي مش حنمشي
إيه التهريج ده ؟!؟!؟
المهم مشي حسني هنا بقى أول عتاب عليهم بس ده حاجة صغيرة
أنتم فصيل كبير ومنظم شجعتوه الناس تمشي ليه ؟
أنتم سبتم الناس تروح ليه ؟
من الناحية الإستراتيجية المفروض لو انتم عايزين تديروا أو حتى تشتركوا في إدارة الدولة انكم ماكنتوش قبلتوا إننا نمشي
نمشي إزاي ؟ والجيش لسة قاعد
الحل الوحيد انكم تكونوا عملتم صفقة مع النظام اللي هو الجيش يعني
لأ محصلشي ماشي أنا آسف إن بعض الظن إثما
نيجي بقى للاستفتاء وفيلم نعم ولأ
نفسي أفهم كنتوا بتشجعوا الناس تقول نعم ليه ؟
عايزين تكتبوا الدستور مثلا ؟
هو أنتم فاهمين إن الدستور بينفع الحكام؟؟
أنتم هبل ؟؟
كان نفع حسني يا حلوين
ولا كنتم عايزين الجيش يمشي ؟؟
يمشي هو الجيش حيمشي ؟
هأو
يمشي ويسلم السلطة لمين ؟
ليكم ولا لليبراليين ولا لليسار ولا للفلول ؟؟
ممكن اقول إن اللي شق الصف كان الليبراليين عشان كانوا أقلية
بس لأ انتم عارفين كويس انكم استخدمتم اساليب وسخة
ومن غير أي سبب غير فرد العضلات
طيب ليه يا بشر
ندالة ؟؟
لأ مش نداله
طيب معلش أنا آسف تاني إن بعض الظن اثما
نيجي بعد كده دعوات لمليونيات عشان المحاكمة بتشتركوا بس مش زي زمان
جت المحاكمة متأخر جدا ومعملتوش حاجة
ماشي مش عايزين تبانوا وماله
مليونية 29 السلفيين ضحكوا عليكم ؟؟!؟
ولا أنتم اللي بتضحكم علينا ؟!؟
إيه الندالة ده ؟!؟
ضحكم عليكم
طيب معلش أنا آسف
إن بعض الظن اثما
مش عايز أرذل واطول عشان اللي بيقرا زمانه اتنفخ
تحالف مع السيد البدوي
اللي بيغسل فلوس حسن عبد الرحمن رسمي
قاتل جريدة الدستور منبر الحرية الوحيد؟!؟!
السيد البدوي ؟؟؟؟؟؟
ندالة
ده ندالة مش ظن
حصلت مشكلة الحدود
أنا الصراحة ساعتها كل ماكنت ماشوف واحد ليبرالي ويقولي بالراحة بشويش
كنت بشتمه
عارفين ليه ؟
عشان أنا مقتنع مليون في المية إن الشعب اللي هزم العادلي بزجاجة مولوتوف وطوبة
يهزم العفريت
فـمش خايف من تصعيد
ومش مصدق الصراحة الافلام بتاعت هزيمة 67 وإن الجيش انتصر بالعافية في 73 وكده
كلام فارغ
كل الحروب اللي فاتت الشعب كان خارج المعادلة دلوقتي الوضع غير
ده نصر الله مرمط اليهود
احنا إيه ؟؟
استندلتوا ومشفناش وشكم عند السفارة
خايفين من الامريكان
أنتم نسيتم إن احنا من ضمن كراهيتنا لحسني إنه كان منبطح مع الامريكان ؟!؟
تعملوا نفس العمله؟؟
ندالة ده صح ندالة مش كده ؟
لأ ده اسمها ندالة و قلة أصل
نيجي ليوم 9 سبتمبر
احنا نازلين ليه ؟؟!؟!؟
نازلين غلاسة
مفيش أسباب
أنا معنديش أسباب انتم معندكوش أسباب
لحد دلوقتي مطمنين للعسكر ؟!؟
ماشي
طيب شايفين اللي حصل في المحاكمة؟
بلاش شايفين ازمات البنزين والسولار ؟
بلاش شايفين إن الحد الاقصى والحد الأدنى مفيش أخبار عنهم ؟
بلاش شايفين الشرطة ؟؟ فين الأمن ؟؟
شايفين جدول زمني لتسليم السلطة ؟؟
مش فارق معاكم ؟!؟
وماله
عموما شكرا يا اخواتنا
بس مكنشي العشم الصراحة
